ສະຖານກົງສຸນໃຫຍ່ແຫ່ງຣາຊະອານາຈັກໄທປະຈຳແຂວງສະຫວັນນະເຂດເຂົ້າຮ່ວມກິດຈະກຳວິຈິດ 5 ພາກ@ນະຄອນພະນົມ

             ເມື່ອວັນທີ 27 ພຶດສະພາ 2023 ທ່ານ ອະທິປັດ ໂຣດຈະນະໄພບູນ ກົງສຸນໃຫຍ່ແຫ່ງຣາຊະອານາຈັກໄທປະຈໍາແຂວງສະຫວັນນະເຂດ ພ້ອມດ້ວຍຄະນະເຈົ້າໜ້າທີ່ສະຖານກົງສຸນໃຫຍ່ແຫ່ງຣາຊະອານາຈັກໄທ ເຂົ້າຮ່ວມພິທີເປີດງານວິຈິດ 5 ພາກ@ນະຄອນພະນົມ “ວິຈິດນະຄອນພະນົມ ນະຄອນແຫ່ງຄວາມສຸກຣິມຝັ່ງຂອງ” ຈັດໂດຍການທ່ອງທ່ຽວແຫ່ງປະເທດໄທ (ທທທ.) ທີ່ລານພະນົມນາຄາ ຈັງຫວັດນະຄອນພະນົມ ລະຫວ່າງວັນທີ 27 ພຶດສະພາ - 4 ມິຖຸນາ 2023 ໂດຍມີທ່ານ ວັນໄຊ ຈັນພອນ ຜູ້ວ່າຣາຊະການຈັງຫວັດນະຄອນພະນົມ ແລະ ທ່ານ ສິຣິປະກອນ ສ່ຽວສະໝຸດ ຮອງຜູ້ວ່າການດ້ານຕະຫຼາດຍູໂຣບ ອາຟຣິກາ ຕະເວັນອອກກາງ ແລະ ອາເມຣິກາ ທທທ. ເປັນປະທານເປີດງານ ພ້ອມດ້ວຍຫົວໜ້າສ່ວນຣາຊະການ ແລະ ພາກເອກກະຊົນຂອງຈັງຫວັດ ຕະຫຼອດຮອດນັກທ່ອງທ່ຽວເຂົ້າຮ່ວມງານເປັນຈຳນວນຫຼາຍ

             ກິດຈະກຳດັ່ງກ່າວຈັດຂຶ້ນຢ່າງຍິ່ງໃຫຍ່ຕະການຕາດ້ວຍເທັກນິກ Mapping ແລະ ການ Light up ສະແດງແສງສີໃນສະຖານທີ່ສຳຄັນທາງປະຫວັດສາດ ແລະ ວັດທະນະທຳຂອງຈັງຫວັດນະຄອນພະນົມ ເຊິ່ງໄດ້ຮັບຄວາມນິຍົມຫຼາຍພາຍຫຼັງສະຖານະການການແຜ່ລະບາດຂອງພະຍາດໂຄວິດ-19 ໄດ້ເບົາບາງລົງ ໂດຍມີອັດຕາສ່ວນການຟື້ນຕົວຂອງການທ່ອງທ່ຽວເປັນອັນດັບ 1 ຂອງພາກຕາເວັນອອກສ່ຽງເໜືອ ແລະ ມີອັດຕາການເຂົ້າພັກ 75%ທັງນີ້ ຈັງຫວັດນະຄອນພະນົມໄດ້ຮັບການຄັດເລືອກເປັນຈັງຫວັດໃນພາກຕາເວັນອອກສ່ຽງເໜືອທີ່ຈັັດງານວິຈິດ 5 ພາກ ໃນຂະນະທີ່ພາກອື່ນໆ ມີຈັງຫວັດທິ່ໄດ້ຮັບການຄັດເລືອກປະກອບດ້ວຍ ກຸງເທບມະຫານະຄອນ ຊຽງຣາຍ ຣະຍອງ ແລະ ນະຄອນສີທຳມະຣາດ